- 345 -

1389. Aug. 18. Liegnitz.

Herzog Ruprecht verkauft für sich und als Vormund seiner Brüder dem Hans Kranch, Hofrichter zu Liegnitz, für 250 Mark den See zu Koschwitz erb- und eigentümlich.

In gotis namen amen. Wir Ruprecht von gotis gnaden . . herczog in Slezien vnd herre zu Legnicz bekennen vffinlich mit desim briue, daz wir von vnsirs selbis wegen vnd von der hochgebornen fursten vnser lieben brudere . . herczogen Wenczlaus, Bonczlaus vnd Heynrichs, diedo von gotlichen gnaden auch mit vns erbherren syn zu Legnicz, der vormunde wir iczund syn, vnsern lieben getrouwen Hannese Cranch vnsern hoeferichter zu Legnicz mit fleize gebeten vnd mit grosir erbeit irbeten habin, daz er vns zu merklichinn fromen, zu vormeiden vnse swere schaden, gelosit hat vnd vns vortreten hat, der er noch geschrebne vnse schulde vnd hat vornemlich vor vns gegaulden hundirt mark Pipken, juden vom Jauwer, do vor er czehn mark ierlichir gulde vmb vorkauft hat vf dem Nawendorffe vnd hat auch vor vns beczalit vnd gegauldin dryvndfierczik marg Wenczlawen, dem getauften juden. Auch hat er Pawiln Wiesgerber zu Legnicz eynvndczwenczik mark vor vns beczalit, vnd hat auch vor vns beczalit Schabdeie iudynne dryvnddrysik marg vnd sechsczen grosschen vnd hat auch Heynriche Abescatsche dreyvndczwenczik marg vnd eynvndfierczik grosschen vor vns beczalit, auch hat er beczalit vor vns funfczehn marg Niclose Quentin zu Legnicz. Auch habin wir em genomen eyn pherd, daz er hat gekauft vmb czwelf mark vnd habin es gegebin vnsirm diener Hitschen von der Ossel. Auch hat er vns gekauft eyn wagenpherd vmb fiertehalbe mark, daz er beczalit mit syme gelde; daz machet alssampt dritthalbhundirt mark vnd eyne mark vnd sebinczendehalbis scot yn eyner somme, dez habin wir gewegen mit rate vnser getrawen eldsten, daz wir vnse getrawen, die vns williclichin dienen, zu vnserm fromen czemelich von gelobden, die se vor vns tun, ledigen vnd losin ane schaden vnd habin demselbin vnserm getrawen lieben Hannese Cranche vnd allin sienen elichin erben vnd rechten nochkomelingen von vnsirs selbis wegin vnd von der obgenanten fursten vnd herren, vnser lieber brudere wegin vnsern sehe zu Koschwicz des Legnitschen wichbildis mit allin sienen zugehorungen, herscheften vnd nuczberkeiten, vornemlich doch mit allen wynthern czogen vnd andern sienen gemessen nichts ausczunemen, wie man die benemet, se werden hie benant adir nicht benand, vorsaczt, vfgelassin vnd an sie gewiesit, denselbin sehe gancz vnd gar zu habin, zubesiczin vnd zugeniessin vnd vormeten vnd die czinse alle iar zu hobin vnd denselbin sehe zu vorkeuffin, zuvorseczen vnd zuvorgebin zu wedirkouffe, wie en allir beheglichst ist vor drithalbhundirt mark vnd eyne marg vnd sebinczendehalbis scot Pragisscher grosschen Polinsscher czal vnd nicht tuer, vnd weme se denselben sehe verkeuffin adir vorseczin, dem globe wir en zu lihen ane wedirrede vnd ane beswernisse, alz se yn iczund habin vnd besiczen, denselben sehe sal Hannus Cranch vnd siene nochkomelinge habin, besiczen vnd gemessen zu allin rechten, herschaften vnd gemessen, alz wir en gehabt habin, besessin vnd genossen, alzo lange, biz daz wir adir vnse nochkomelinge, erbherren zu Legnicz, denselbin sehe wedir denselbin Hannese Cranch adir wedir siene erben vnd nochkomelinge wedir gelosin vm drithalbhundirt mark vnd eyne marg vnd sebinczendehalbis scot muncze vnd werunge, also vorgeschrebin stet, mytynandir, der selbin losunge behaldin wir vns frye vnd vngehindirte macht, wen wir daz vormogen. Dez zu bestetegunge vnd zu sichirheit habin wir en desin brieff gegebin vorsegilt mit vnsirm gemeynen ingesegil, zu Legnicz, noch gotis geburde vnsers lieben herren tawsund vnd dryhundirt jare ynm newnvndachtczegsten jare am send Agapici tage. Do bie synt gewest vnse getrawen lieben, er Bernhard vom Ffurstensteyne, er Ffrederich vom Pechwinkele, er Diterich von Predil, Hentschil von Redern, Gotsche Schoff, Tamme von Redern vnd er Thomas Gythan, vnsir schriber, dem wir desin brief beuolen.

O. d. St. L. No. 174. Das Siegel an Pergamentstreifen.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866